תהילים צב

מִזְמור שִׁיר לְיום הַשַּׁבָּת: טוב לְהודות ליהוה. וּלְזַמֵּר לְשִׁמְךָ עֶלְיון: לְהַגִּיד בַּבּוקֶר חַסְדֶּךָ. וֶאֱמוּנָתְךָ בַּלֵּילות: עֲלֵי עָשור וַעֲלֵי נָבֶל. עֲלֵי הִגָּיון בְּכִנּור: כִּי שמַּחְתַּנִי יהוה בְּפָעֳלֶךָ. בְּמַעֲשי יָדֶיךָ אֲרַנֵּן: מַה גָּדְלוּ מַעֲשיךָ יהוה. מְאד עָמְקוּ מַחְשְׁבותֶיךָ: אִישׁ בַּעַר לא יֵדָע. וּכְסִיל לא יָבִין אֶת זאת: בִּפְרחַ רְשָׁעִים כְּמו עֵשב. וַיָּצִיצוּ כָּל פּעֲלֵי אָוֶן. לְהִשָּׁמְדָם עֲדֵי עַד: וְאַתָּה מָרום לְעולָם יהוה: כִּי הִנֵּה איְבֶיךָ יהוה. כִּי הִנֵּה איְבֶיךָ יאבֵדוּ. יִתְפָּרְדוּ כָּל פּעֲלֵי אָוֶן: וַתָּרֶם כִּרְאֵים קַרְנִי. בַּלּתִי בְּשֶׁמֶן רַעֲנָן: וַתַּבֵּט עֵינִי בְּשׁוּרָי. בַּקָּמִים עָלַי מְרֵעִים תִּשְׁמַעְנָה אָזְנָי: צַדִּיק כַּתָּמָר יִפְרָח. כְּאֶרֶז בַּלְּבָנון יִשגֶּה: שְׁתוּלִים בְּבֵית יהוה. בְּחַצְרות אֱלהֵינוּ יַפְרִיחוּ: עוד יְנוּבוּן בְּשיבָה. דְּשֵׁנִים וְרַעֲנַנִּים יִהְיוּ: לְהַגִּיד כִּי יָשָׁר יהוה. צוּרִי וְלא עַוְלָתָה בּו: