תהילים לד

לְדָוִד בְּשַׁנּותו אֶת טַעְמו לִפְנֵי אֲבִימֶלֶךְ. וַיְגָרְשֵׁהוּ וַיֵּלַךְ: אֲבָרְכָה אֶת יהוה בְּכָל עֵת. תָּמִיד תְּהִלָּתו בְּפִי: ביהוה תִּתְהַלֵּל נַפְשִׁי. יִשְׁמְעוּ עֲנָוִים וְיִשמָחוּ: גַדְּלוּ ליהוה אִתִּי. וּנְרומְמָה שְׁמו יַחְדָּו: דָּרַשְׁתִּי אֶת יהוה וְעָנָנִי. וּמִכָּל מְגוּרותַי הִצִּילָנִי: הִבִּיטוּ אֵלָיו וְנָהָרוּ. וּפְנֵיהֶם אַל יֶחְפָּרוּ: זֶה עָנִי קָרָא ויהוה שָׁמֵעַ. וּמִכָּל צָרותָיו הושִׁיעו: חונֶה מַלְאַךְ יהוה סָבִיב לִירֵאָיו וַיְחַלְּצֵם: טַעֲמוּ וּרְאוּ כִּי טוב יהוה. אַשְׁרֵי הַגֶּבֶר יֶחֱסֶה בּו: יְראוּ אֶת יהוה קְדושָׁיו. כִּי אֵין מַחְסור לִירֵאָיו: כְּפִירִים רָשׁוּ וְרָעֵבוּ. וְדורְשֵׁי יהוה לא יַחְסְרוּ כָל טוב: לְכוּ בָנִים שִׁמְעוּ לִי. יִרְאַת יהוה אֲלַמֶּדְכֶם: מִי הָאִישׁ הֶחָפֵץ חַיִּים. אהֵב יָמִים לִרְאות טוב: נְצור לְשׁונְךָ מֵרָע. וּשפָתֶיךָ מִדַּבֵּר מִרְמָה: סוּר מֵרָע וַעֲשה טוב. בַּקֵּשׁ שָׁלום וְרָדְפֵהוּ: עֵינֵי יהוה אֶל צַדִּיקִים. וְאָזְנָיו אֶל שַׁוְעָתָם: פְּנֵי יהוה בְּעושי רָע. לְהַכְרִית מֵאֶרֶץ זִכְרָם: צָעֲקוּ ויהוה שָׁמֵעַ. וּמִכָּל צָרותָם הִצִּילָם: קָרוב יהוה לְנִשְׁבְּרֵי לֵב. וְאֶת דַּכְּאֵי רוּחַ יושִׁיעַ: רַבּות רָעות צַדִּיק. וּמִכֻּלָּם יַצִּילֶנּוּ יהוה: שׁמֵר כָּל עַצְמותָיו. אַחַת מֵהֵנָּה לא נִשְׁבָּרָה: תְּמותֵת רָשָׁע רָעָה. וְשנְאֵי צַדִּיק יֶאְשָׁמוּ: פּודֶה יהוה נֶפֶשׁ עֲבָדָיו. וְלא יֶאְשְׁמוּ כָּל הַחוסִים בּו: