תהילים צב

מִזְמוֹר שִׁיר לְיוֹם הַשַּׁבָּת: טוֹב לְהֹדוֹת לַיהוה וּלְזַמֵּר לְשִׁמְךָ עֶלְיוֹן: לְהַגִּיד בַּבֹּֽקֶר חַסְדֶּֽךָ וֶאֱמוּנָתְךָ בַּלֵּילוֹת: עֲלֵי־עָשׂוֹר וַעֲלֵי־נָֽבֶל עֲלֵי הִגָּיוֹן בְּכִנּוֹר: כִּי שִׂמַּחְתַּֽנִי יהוה בְּפָעֳלֶֽךָ בְּמַעֲשֵׂי יָדֶֽיךָ אֲרַנֵּן: מַה־גָּדְלוּ מַעֲשֶֽׂיךָ יהוה מְאֹד עָמְקוּ מַחְשְׁבֹתֶֽיךָ: אִישׁ־בַּֽעַר לֹא יֵדָע וּכְסִיל לֹא־יָבִין אֶת־זֹאת: בִּפְרֹֽחַ רְשָׁעִים כְּמוֹ עֵֽשֶׂב וַיָּצִֽיצוּ כָּל־פֹּֽעֲלֵי אָֽוֶן לְהִשָּׁמְדָם עֲדֵי־עַד: וְאַתָּה מָרוֹם לְעֹלָם יהוה: כִּי הִנֵּה אֹיְבֶֽיךָ יהוה כִּי־הִנֵּה אֹיְבֶֽיךָ יֹאבֵֽדוּ יִתְפָּרְדוּ כָּל־פֹּֽעֲלֵי אָֽוֶן: וַתָּֽרֶם כִּרְאֵים קַרְנִי בַּלֹּתִי בְּשֶֽׁמֶן רַעֲנָן: וַתַּבֵּט עֵינִי בְּשׁוּרָי בַּקָּמִים עָלַי מְרֵעִים תִּשְׁמַֽעְנָה אָזְנָי: צַדִּיק כַּתָּמָר יִפְרָח כְּאֶֽרֶז בַּלְּבָנוֹן יִשְׂגֶּה: שְׁתוּלִים בְּבֵית יהוה בְּחַצְרוֹת אֱלֹהֵֽינוּ יַפְרִֽיחוּ: עוֹד יְנוּבוּן בְּשֵׂיבָה דְּשֵׁנִים וְרַעֲנַנִּים יִהְיוּ: לְהַגִּיד כִּי־יָשָׁר יהוה צוּרִי וְלֹא־עַוְלָֽתָה בּוֹ: